पवन औजी
कञ्चनपुर – कञ्चनपुरको भारतसँग सीमा जोडिएको पश्चिमी नाका गड्डाचौकीमा सशस्त्र प्रहरी बलले लागुऔषध, हातहतियार तथा विस्फोटक पदार्थको अवैध ओसारपसार नियन्त्रण गर्न तालिमप्राप्त दुई कुकुर परिचालन गरेको छ।
दसैँलाई लक्ष्य गरी सशस्त्र प्रहरीले अल्फा र डेल्टा नामका दुई कुकुर नाकामा खटाएको हो। दुवै कुकुरलाई गड्डाचौकीस्थित सशस्त्र प्रहरीको सीमा सुरक्षा बल गुल्ममा राखेर नियमित रूपमा सीमा क्षेत्रमा निगरानी तथा सुरक्षा जाँचमा परिचालन गरिने सशस्त्र प्रहरीले जनाएको छ।
सशस्त्र प्रहरी बल नेपाल नम्बर ३५ गण हेडक्वाटर (शैलेश्वरी) का सशस्त्र प्रहरी उपरीक्षक प्रेमप्रकाश सिग्देलका अनुसार अल्फाले लागुऔषध पत्ता लगाउनेछ भने डेल्टाले हातहतियार तथा विस्फोटक पदार्थ पहिचान गर्नेछ।
दुवै कुकुरलाई आवश्यकताअनुसार सीमा क्षेत्रमा खटाइने सिग्देलले बताए। कञ्चनपुरमा लागुऔषधको समस्या जटिल बन्दै गएका बेला तालिमप्राप्त कुकुर परिचालनले यसको नियन्त्रणमा सहयोग पुग्ने अपेक्षा गरिएको छ।
कञ्चनपुरका प्रमुख जिल्ला अधिकारी मदन कोइरालाले सीमा क्षेत्रमा तालिमप्राप्त कुकुरको आवश्यकता रहेको बताए। मानिसले सहजै पहिचान गर्न नसक्ने शंकास्पद वस्तु तथा पदार्थ कुकुरले पत्ता लगाउन सक्ने भएकाले यसको परिचालन प्रभावकारी हुने उनको भनाइ छ।
Leave a Reply