सुदूरपश्चिम प्रदेशमा तीन महिनामा विपद्का घटनाबाट १४ जनाको मृत्यु

सुदूरपश्चिम प्रदेशमा तीन महिनामा विपद्का घटनाबाट १४ जनाको मृत्यु भएको छ। श्रावण १ गतेदेखि असोज ३१ गतेसम्मको अवधिमा प्रदेशको विभिन्न स्थानमा घटेका विपद्का घटनामा परी १४ जनाको मृत्यु भएको छ भने २६२ जना घाइते भएका छन्।

सुदूरपश्चिम प्रदेश आपतकालिन कार्य सञ्चालन केन्द्र धनगढीका अनुसार संकलन गरेको विवरणमा चालु आर्थिक वर्षको साउनदेखि असोजसम्म तीन महिनाको अवधिमा प्रदेश भरी विपद्का ५६३ वटा घटना भएका छन्। जसबाट ८८ लाख ८ हजार मूल्यको धनमाल नष्ट भएको छ।

विपद्का घटनामा सर्पदंशका सबैभन्दा बढी २११ वटा घटना भएका छन्। यसबाट २ पुरुष, ६ महिला गरी ८ जनाको मृत्यु भएको छ भने २०६ जना घाइते भएका छन्। सर्पदंशबाट २१३ परिवार प्रभावित भएका छन्।

चट्याङ्गका १२ वटा घटनामा १ पुरुष र २ महिला गरी ३ जनाको ज्यान गएको छ। चट्याङ्गबाट १५ जना घाइते भएका छन्। यस्तै पहिरोका ११५ घटनामा १ जना महिलाको मृत्यु भएको छ भने ९ जना घाइते भएका छन्। पहिरोले २०० परिवार प्रभावित भएका छन् भने ८ घर पूर्ण र ८ घर आंशिक रूपमा क्षति भएका छन्। बाढीका १८ घटनामा १ जनाको मृत्यु भएको छ भने अनुमानित ३ लाख ५० हजार रुपैयाँ बराबरको क्षति भएको छ। प्रदेशमा जनावरको आक्रमणका ४३ वटा घटनामा १ जनाको मृत्यु छ। यसबाट १९ जना घाइते भएका छन्।

तीन महिनाको अवधिमा ५२ वटा आगलागीका घट्ना भएका छन्। आगलागीबाट ६ जना घाइते भएका छन् भने ६ लाख ११ हजार १ सय रुपैयाँको धनमाल जलेर नष्ट भएको सुदूरपश्चिम प्रदेश आपतकालिन कार्य सञ्चालन केन्द्र धनगढीले संकलन गरेको विवरणमा उल्लेख छ।

यसै अवधिमा ९१ वटा भारी वर्षा भएका छन्। भारी वर्षाबाट ११४ परिवार प्रभावित भएका छन्। भारी वर्षाकारण ११ लाख १० हजार रुपैयाँ बराबरको क्षति भएको छ। हावाहुरीका १७ वटा घटनामा १९ परिवार प्रभावित भएका छन्। प्रदेश भरी विपद्का घटनाबाट ७१३ परिवार प्रभावित भएको विवरणमा उल्लेख छ। तीन महिनाको अवधिमा ३ वटा लेक लाग्नुको घटना भएको केन्द्रले जनाएको छ।