काठमाण्डाै – नेपाल प्रिमियर लिग (एनपीएल) काे तेस्राे संस्करणमा डीआरएस प्रविधि प्रयोगमा ल्याउने तयारी भएको छ ।
नेपाल क्रिकेट सङ्घ (क्यान) ले आयोजना गर्न लागेको प्रतियोगितामा निर्णय पुनरावलोकन प्रणाली (डीआरएस) भित्र्याउनेबारे अहिले छलफल केन्द्रित छ ।
क्यानका सचिव पारस खड्काकाअनुसार यो अत्याधुनिक प्रविधिलाई प्रतियोगितामा समावेश गर्न झन्डै डेढदेखि २ करोड रुपैयाँसम्म खर्च लाग्ने अनुमान छ । यस विषयमा छिट्टै औपचारिक घोषणा गरिने सचिव खड्काले बताउनुभएको छ ।
डीआरएस प्रविधि जडानका लागि लाग्ने खर्चकाे व्यवस्थापन क्यान र सहभागी आठ वटै फ्रेन्चाइजी टोलीले संयुक्त रूपमा वहन गर्ने योजना छ । कमर्सियल मिडिया राइट्सबाट आउने ५० प्रतिशत आम्दानी बाँडफाँटको हिस्साबाट यो खर्च समायोजन गरिनेछ । यसले गर्दा कुनै एकल पक्षमाथि आर्थिक भार नपर्ने सचिव खड्काको भनाइ छ ।
अहिले छलफल मात्रै भइरहेको र यसबारे आधिकारिक निर्णय प्रक्रिया पूरा भएपछि मात्र सार्वजनिक गरिने उहाँकाे भनाइ छ ।
Leave a Reply