बाजुरामा पहिरोले दुई घर बगायो

बाजुरामा पहिरोले दुई घर बगाएको छ। बिहीबार दिउँसो बाजुराको गौमुल गाउँपालिका–३ कटी गाउँमा अविरल वर्षासँगै आएको पहिरोले स्थानीय पूर्णिमल बोहरा र बुदी बोहराको घर बगाएको जिल्ला प्रहरी कार्यालय बाजुराले जनाएको छ।

पहिरो दिउँसो आएको हुँदा मानवीय क्षति भने नभएको जिल्ला प्रहरी कार्यालय बाजुराका सूचना अधिकारी नरेशबहादुर शाहीले बताउनुभयो। तर घरमा रहेका सम्पूर्ण सामान भने पूर्ण रूपमा नष्ट भएको उहाँले जानकारी दिनुभयो।

उहाँका अनुसार घरमा रहेका अन्नपात, भाँडाकुँडा, लत्ताकपडालगायत सबै सामान नष्ट भएका छन् ।

पहिरोका कारण अन्य दुई घरधुरी पनि जोखिममा परेका छन्। साथै, आसपासका १४ घरपरिवारसमेत जोखिममा परेपछि उनीहरूलाई सुरक्षित स्थानमा सारिएको सूचना अधिकारी शाहीले बताउनुभयो।